Tragedia Sicula

'Benadica a tutti paridi na cosa va è parrari

di n'Paisi cu la Turriunni lentu u tempu scurri,

ca li casi sunu stritti
e li fimmini su spetti,
li masculi cuntati
ogni sira sirinati!

Lu barcuni è nicareddu
ci pusteggi u sciccareddu
na la manu la chitarra
e pi te lu cori parra.

Idda è bedda e tunnicedda
sempri sula ninzintedda
lu to cantu ci piaci
ti marita cu la paci.

Quannu tuttu è sistimatu
lu parrinu è arriatatu
ma la uci dici chiaru
cu nan parra è munzignaru!

Fermi tutti , chi faciti
lu matrimaniu pruibbiti
stu signuri è spusatu
di la chiesa e di lu statu!

Chi diciti munzignaru
di sta cosa sugnu 'ngnaru
su la genti cà mi cridi
ju nan misi mai la fidi!

Li famigghi su 'nfirmentu
tutti n'terra no frumentu
tumpulati e muzzicuni
la vindetta pi scasciuni!

Agghiurnari di tri misi
ci finenu li surrisi
ca la fimmina cunfunna
misa i sciancu è chiù tunna!

Ah, lu fruttu t' à lassatu
e pareva 'mpriparatu
chi facemu pi rimidiari
lu carusu a ma chiamari!

Si prisenta risidutu
cu lu fari di n'curnutu
e ci dici a vuci fina
sta minestra cu arrimina?

Chi voi diri, dici a Matri,
tu jucasti cu li petri
pà bonarma dò Zù Puddu
ci rumpisti u caruseddu!

Lucarusu resta tisu
e si leva lu surrisu
si ci curvunu li spaddi
e li ammi avi moddi!

Ma chi dici signuruzza
la me manu mai ci truzza
ju aspittava la funzioni
mi mittiricci attinzioni!

Vostra figghia è cuscenti
di lu masculu giacenti
fussi cosa di spiari
cu ci desi lu piaciri!

Ah, maliditta figghia mè
tutta a copia di sa Zè
ogni masculu passanti
l'avi n'casa comu amanti!

Veni ccà disgazziata
non ti dugnu tumpulata
nesci fora lu so nomu
o ti cerca su è Omu!

Fermi tutti , chi faciti!

Ma sta frasi è 'mpicata,
nilla menti cullucata,
siti forsi lu seggettu
ca 'mpidiu lu prugettu?

Si signura sugnu ju,
ormai odiu nenti chiù
'ntirpillastru cu è Omu
Fui, ju, nan sacciu comu!

Ah, na sai cumu? Ma va?
Malidittu veni ccà
ca ti scippu a scimitarra
è la matri ca ti parra!

Unni vai cunpari Turi
cu la facci i tradituri
la to morti è lu prezzu
o la porti cu lu mazzu!

Fermi tutti, chi faciti!
sugnu prontu, aspittati
mi la sposu cu piciri
e mi godu cu a nasciri!

Finalmenti su cuntenti
abbrissati li parenti
la campana soni rari
tutti n'chiesa a priari!

Si lu sposu è carinu
cirimonia lu parrinu
allu scambiu di lu Si
idda scatta adaccussi!

Fermi tutti, aspittati!
li prisenti su scioccati
tutti a ditta timurusi
semu n'clima di supprisi?

Fermi tutti amici mè
matrimoniu nan ci nnè,
picchi u patri di stu fissa
è cu predica la missa!

Arraggiati l'invitatati
cu li seggi su armati
assicutunu Patri Ugottu
ca s'abbagna lu viscottu!

Picos