Ma comu nasci lu parrari Paturnisi?
pi putillu sapiri la sorti sicci misi
scamminannu li carti di me nannu
capiu quannu l'omu parrava comu tannu
u Paturnisi era grandi pridaturi
cuntadinu e gran lavuraturi
lu parrari carcararu di lu paisanu
canusciutu è di lu munnu sanu!
Fu la sorti a vulillu arriatatu
ma la svintura fu ridducillu allarunghiatu!
lu puureddu si truava a lu Simetu
misu 'nposa pi la pisca a lu cannetu
quannu posa lu so pedi n'da na cuti
ca di picca non ci appizza la saluti!
cu lu sbattiri la testa rapi a ucca
e la larunghia tutta sana si la mmucca!
povira bestia n'di la panza a graciari
lu poviru cuntadinu fa piniari
accumincia lu dialettu a variari
piddavearu mi piaaci e cosi rari
ninzinteddu fa la scola cull'addeu
quannu parra n'sichitanza è babbeu
n'di la chiana finu a Malta si distingui
pigghi sguala cu l'accentu tutti i lingui!
Lu parrari allarunghiatu pigghia pedi
lu tramanna miscillatu all'eredi
su è bellu è troppu beallu verameanti
tu lu senti e ti 'ntrippi i sintimeanti!
Allarunghiatameante beallu è lu me Paisi
non cinnè pi nuddu, semu Paturnisi
unni vai si di tutti canusciutu
e pi la to prununcia si arridutu!
LA Larunghia è n'animali troppu bellu
fora l'accua ogni jornu fa burdellu
avi u sciumi cu li petri comu lettu
e s'allena tuttu u tempu cò dialettu!
N'sidiata intra gebbi ca si lava
u dialettu Paturnisi si scutava
lu viddanu ca parrava ancora rozzu
non ci aveva lu trimuri ni lu cannarozzu!
Quannu visti a li so occhi la Larunghia
maistusa e cu lu pettu ca si unghia
cu lu sfuttò iddu tenta discussioni:
Ciau bidduzza ,chi mi duni na lezioni?
Vulissi a te spiari, a campagna ti piaci?
-Paisanu si gnuranti e la parola c'ai pisanti
ppi parrari n'modu finu e 'ntilligenti
tu aviri na cascata chiù mpurtanti!
Prova a fari allinamentu, appiddaveaaru
u seenti comu soona beallu, u pumadoaru
Babbareeadda do paiesi è troppu beadda!
gra gra ora abboala e 'nsigna la to vaneadda!
Lu viddanu n'tusiasta npaia lu sceccu,
li cunuscenti a uanu a uanu ora cearcu
stu parrari allarunghiatu pari beallu
ma chi dicu, su ci peansu è troppu Beaallu!
Picos
